Hatutan.com, (07 Janeiru 2022), Díli—Polísia Nasionál Timor-Leste (PNTL), liuhosi Komandu Munisípiu Díli, Orienta ona ekipa Servisu Informasaun Polísia (SIP) hodi buka-tuir autór ne’ebé óho António de Jesus Soares (25), iha Delta 4-Elemloi, aldeia Săo José Ai-meti Laran, Suku Comoro, Postu Administrativu Dom Aleixo, Munisípiu Díli, Segunda 07 Fevereiru 2022 tuku 01:13 oras madrugada.

“Komandu Díli orienta ona membru sira, liuhosi Servisu Informasaun Polísia, buka-tuir autór ka suspeitu ne’ebé oho matebian, tanba halai sees hosi lokál insidente,” Komandante Munisípiu Díli, Superintendente Xefe Polísia, Hendrique da Costa informa iha kna’ar fatin Komandu Caicoli, Segunda (07/02/2022).

Maski nune’e, Superintendente Xefe Polísia, Hendrique da Costa mós rekomenda ba jornalista sira atu bele konfirma kazu ne’e ho parte investigasaun kriminál nasionál kona-bá prosesu ne’e.

Komandante Hendrique labele fó informasaun detallu, tanba kazu ne’e komandu PNTL, liuhosi Polísia Nasionál Servisu Investigasaun Kriminal (PNSIK) mak atende no oras-ne’e sira mós hala’o prosesu buska no identifikasaun ba autór sira.

Hatutan.com tenta halo konfirmasaun ho Portavóz Komandu Jerál PNTL, Superintendente Xefe Polísia, Armando Monteiro, maibé seidauk fó informasaun ruma, tanba seidauk iha relatóriu eskrita ruma hosi parte PNSIK.

Iha sorin seluk, Alda Borges Soares, nu’udár feen-kaben hosi matebian haktuir, durante ne’e nia laen (matebian) hala’o hela atividade fa’an terang bulan iha estrada ibun área Elemloi no matebian sempre fila ba uma iha tuku ida madrugada.

“Nia ba servisu fa’an terang bulan, fila mai mak ema asaltu iha dalan. Nia sai tuku ida ho balun,” Alda Borges Soares, hateten ba jornalista sira, iha sala mortuáriu Hospitál Nacional Guido Valadares (HNGV), Bidau-Díli.

Alda Borges Soares hatene katak, durante ne’e matebian laiha problema ho ema seluk, no mós la envolve iha Grupu Arte Marsiál (GAM) ruma.

Bainhira hetan taa hosi autór ka suspeitu sira, ho iis natón ne’ebé iha, matebian konsege ba to’o uma, hodi bolu nia ferik oan no informa mós kona-bá nia kondisaun ne’ebé kanek.

“Nia tama mai ne’e hakilar de’it, domin, ema taa ha’u. Mak ne’e de’it ona, ami sai mai ne’e, nia tuur loos de’it ona, nia la ko’alia buat ida. Nia tuur kala nia sente nia ran sai ne’e, nia oin kamutis loss, hanesan oin fila kedan,” Alda Borges Soares, konta-tuir.

Família ho viziñu sira kontaktu kedan ba ambulánsia, hodi transporta duni vítima ba HNGV, maibé, infelizmente labele salva, tanba iis-kotu (mate).

“Nia iis kotu kedan iha uma, obriga de’it mak lori to’o mai Ospitál, iha tuku rua,” kaben ne’e, konta tuir.

Matebian ho naran, António de Jesus Soares (25), orijen hosi aldeia Aidaba-Leten, Suku Hatás, Postu Administrativu Atabae, Munisípiu Bobonaro.

Matebian kaben ho Alda Borges Soares, hosi Munisípiu Aileu no husik hela feen-kaben ho oan mane ida, ne’ebé sei idade tinan-ida, fulan-neen.

Jornalista: Rogério Pereira Cárceres