Hatutan.com, (04 Fevereiru 2022), Dili-Iha 2021, Governu Timor-Leste halo preparasaun sosa produtu hosi produtór timor-oan sira nian, atu bele lori ba hatudu iha eventu internasionál Expo Dubai. Infelizmente, produtu ne’ebé Governu halibur husi produtór timoroan sira, balu la konsege lori ba Dubai no rai de’it iha kontentór laran durante fulan-lima resin.  

Notísia iha Relasaun: Partisipasaun TL iha Expo Dubai Ba Fase-Matan

Produtu povu nian ne’ebé Governu sosa atu lori ba Expo Dubai mas seidauk to’o agora rai de’it iha kontentor laran. Foto/Hatutan.com

Ba asuntu ne’e, Ministru Koordenadór Asuntu Ekonómiku (MKAE), Joaquim Amaral, informa katak, nia ladún iha informasaun kona-bá razaun tanba saida mak, produtu sira labele lori ba Dubai. Maibé, Ministru Joaquim fó razaun katak, dala-ruma problema transporte mak ‘laiha’. 

“Ha’u ladún iha informasaun natoon ba ida ne’e, o que serto, bele mós tanba transporte,” Ministru Koordenadór Asuntu Ekonómiku (MKAE), Joaquim Amaral, hateten ba Hatutan.com, hafoin partisipa iha serimónia lansamentu Estratéjia Nasionál ba Protesaun Sosiál, iha Salaun Otél D’City 8, iha Canossa, Haslaran-Dili, Sesta (04/02/2022).

Ministru Joaquim, fundamenta tán katak, produtu sira ne’ebé ekipa komisaun Expo la  konsege transporta lori ba hatudu iha Expo Dubai, tanba tenke prosesa liuhosi Autoridade Aduaneira sira. Ho nune’e maka, la konsege transporta ba Dubai.

“Bele mós tanba sasán sira ita haruka bá ne’e, tenke liuhosi prosesu Aduaneira ida ne’ebé, ita tenke haruka produtu sira ba iha ne’ebá,” Joaquim hateten. 

Ministru Joaquim halo komparasaun katak, prosesu atu lori sasán ka produtu hosi nasaun ida ba seluk, la’ós fásil no la’ós hanesan ho merkadu ne’ebé iha TL. Tanba ne’e maka ekipa sira iha komisaun Expo Dubai nian, deside transporta uluk produtu sira ne’ebé konsidera hanesan orijinál.  

Notísia iha Relasaun: Ministru Joaquim ‘Seidauk’ Garante Prezensa TL iha Expo Dubai Dada Investór

 “Tanba ne’e mak hanesan la fasil, hanesan ita lori ba ita nia merkadu, ohin selu. Agora, ba fali merkadu rai seluk, rai sira ninia regra iha, entaun ita nia produtu ne’e, ninia orijen sira, tenke haruka uluk. Haruka, sira verifika, sira hatán, foin ita bele bá,” ministru Joaquim fundamenta.

Alende ne’e, dala-ruma mós tanba situasaun estadu emerjénsia ne’ebé kauza hosi pandemia globál COVID-19, iha korrespondénsia atu haruka amostra (sampel) sira-ne’e tarde, nune’e maka, la konsege haruka bá Dubai.

Ministru Joaquim, sujere ba Hatutan.com atu konfirma asuntu ne’e, ho Ministru Turizmu Komérsiu no Indústria (MTKI), José Lucas do Carmo da Silva, nu’udár mós prezidente autoridade Expo Dubai nian, no mós ho Koordenadór Komisaun Expo Dubai, Manuel Vong.  

Hatán kona-bá produtu saida mak durante ne’e komisaun expo la konsege lori ba Dubai no rai de’it iha kontentór laran, ministru Joaquim rasik laiha koñesimentu.

“Ida ne’e, ha’u ladún hatene, informasaun detallu kona-bá grupu sé-sé ka kompañia sé-sé, no produtu saida maka sira simu, no agora sei iha hela konteiner ne’e. Ha’u hanoin, informasaun detallu ne’e, bele husu diretamente ba sira,” ministru Joaquim, hateten tán.

Antes ne’e, Hatutan.com, tenta halo esforsu dala-tolu hodi konfirma ho Koordenadór Komisaun Expo Dubai, Manuel Vong, iha edifísiu Expo Dubai TL iha eis Edifisiu CPLP, Dili, maibé  la konsege tanba Manuel Vong sempre okupadu ho servisu.

Jornalista: Rogério Cárceres