Hatutan.com, (26 Janeiru 2022), Dili– Sekretáriu Jerál  Partidu Frente Revolusionáriu Timor-Leste Independente (FRETILIN), Mari Bin Amude Alkatiri, daudaun ne’e, iha ona dalan  husi Portugal mai Dili.

Notísia iha Relasaun: Alkatiri Moras Todan Ne’e Laloos

Sekretáriu Jerál FRETILIN, Mari Alkatiri. Foto/Hatutan.com

Tuir informasaun ne’ebé hatutan husi Prezidente Organizações Filiadas da FRETILIN (OFILIN), José Manuel Nakfilak,  katak, Kinta aban (27/01/2022), purvolta tuku 12:00 Otl, Mari Alkatiri,  to’o hikas iha Dili liuhusi Aeroportu Internasionál Prezidente Nicolau Lobato, Comoro, Dili.

“Aban, ha’u konvida ita jornalista sira ba iha aeroportu, tuku 12:00 Otl, hodi hein, Mari Alkatiri tuun husi aviaun,” José Manuel Nakfilak informa hodi responde jornalista sira kona-bá espekulasaun balun ne’ebé hateten Mari Alkatiri  la fila  ona mai TL.

Tuir “Nakfilak”, krize boot iha 2006 de’it Sekretáriu Jerál FRETILIN, Mari Alkatiri la halai, tanba sá mak iha ‘situasaun estabilidade’ hela, FRETILIN admite atu Alkatiri halai.

“Ita keta kahur sasán sira ne’e. Aban, ba akompaña konferénsia imprensa Sekretáriu Jerál FRETILIN nian, nia sei hatete buat balu iha ne’ebá. Mais, ami adianta de’it tanba dehan halai ne’e maka, ami hatete dehan, aban nia to’o iha aeroportu Prezidente Nicolau Lobato, Dili. Ita hotu bele ba haree,” Nakfilak, konfirma tan.

Iha loron 29 fulan-Dezembru 2021, eis Primeiru-Ministru Mari Alkatiri, halo viajen ba Portugál hodi pasa ferias tinan foun, 01 Janeiru 2022 nian ho família sira iha Portugal.   

 Jornalista: Rogério Cárceres