Hatutan.com, (20 Janeiru 2022), Dili – Estadus Unidus Amerika (EUA) reafirma ninia apoiu makaas ba Ukránia nia soberania no integridade territoriál iha ninia fronteira internasionál ne’ebé rekoñesidu, hodi haluan ninia territóriu tasi. Relasaun entre EUA no Ukraine sai hanesan baze ba seguransa, demokrasia no direitus umanus iha Ukránia no rejiaun ne’ebé luan liu.

Ministru Negósiu Estranjeiru EUA, Anthony Blinken ho Prezidente Ukraina Volodymyr Zelenskyy. Foto/Espesiál

“Estadus Unidus Amérika hamriik hamutuk ho ami-nia aliadu sira Europeu nian ne’ebé apoia Ukránia,” Enkarregadu Negósiu Embaixada Estadus Unidus nian Tom Daley hateten. “Orden bazeia ba lei internasionál depende ba ita-nia abilidade koletivu atu halibur malu hodi tane aas padraun fundamental soberania no integridade territorial. Prinsípiu hirak ne’ e, hamutuk ho rezolusaun pasifika ba disputa sira, fó benefísiu ba nasaun boot no ki’ik sira hotu. Estadus Unidus sei kontinua servisu maka’ as ho ami-nia aliadu sira no parseiru sira hodi avansa vizaun ne’ebé fahe ba malu.”

Liuhusi komunikadu imprensa ne’ebé Hatutan.com asesu, Kinta (20/01/2022), Estadus Unidus no Ukránia fahe dezeju komún ida ba futuru ida ne’ebé nabilan no prósperu ba Ukránia tomak. Estadus Unidus kontinua iha kompromisu atu apoia Ukránia nia soberania no integridade territoriál no ajuda Ukránia avansa nia aspirasaun sira Euro-Atlantic nian.

Durante dékada tolu liubá, Rúsia invade ona nasaun viziñu tolu – Ukránia, Georgia no Moldova – interfere iha eleisaun, uza arma kímika hodi koko nasaun rua iha rai- li’ur no rai-laran (Skripal, Navalny), no viola akordu internasionál sira kona-ba kontrola kilat. Estadus Unidus ho nia aliadu sira sei diskute problema hirak nee no asuntu sira seluk ho Russia iha loron no semana hirak tuir mai.

Rúsia nia propaganda sira inklui liu husi media sosiál sira, uza media online ne’ebé apoia Rúsia, hatama desinformasaun ba estasaun televizaun no rádiu sira, organiza konferénsia sira ne’ebé dezeña atu influensia partisipante sira ba falsifika katak Ukránia – la’ós Rúsia – iha sala atu hasae tensaun iha rejiaun, no intensifika operasaun sibernétika nian atu estraga media sira no organiza operasaun “hack and release” atu fó sai ema ninia dadus privadu sira.

Estadus Unidus halo hela konsulta intensivu ho omólogu sira husi Europa kona-bá meius oioin no kona-bá pakote espesífiku sira husi konsekuénsia grave sira hasoru Rúsia relasiona ho tensaun militár iha Ukránia. Hamutuk ho aliadu sira, Estadus Unidus sei responde ho medida ekonómika forte ne’ebé sei hamosu kustu signifikante ba ekonomia Russia nian no nia sistema finanseiru. Ne’e inklui asaun forte sira ne’ebé Estadus Unidus la foti hasoru Russia iha tinan 2014 no prepara atu implementa agora.

Jornalista: Vito Salvadór