Hatutan.con (18 Janeiru), Díli—Martinho Germano da Silva Gusmão, nu’udár Padre dispensadu dahuluk iha istória Uma Kreda Katólika Timor-Leste, deklara ofisialmente kandidata an ba Prezidente Repúblika periudu 2022-2027, hafoin hetan bensaun morál hosi ulun boot Igreja Katólika iha Roma, Papa Francisco.

Notisia iah Relasaun:Eleisaun ba Prezidente Repúblika Sei Realiza iha 19 Marsu 2022

Martinho Germano da Silva Gusmão. Foto/Hatutan.com.

Kandidatu ne’e, promete atu sai Prezidente República labele tane liman no husu “ezmola” ka “prezente” hosi ema ida ka rua, maibé restaura soberania ne’ebé iha povu nia liman.

Tamba ne’e, hanesan Jerasaun foun mai ho paradigma foun no hanoin foun katak, bainhira “katuas” sira lakohi fó sira nia kbaas atu jerasaun foun hateke dook ba oin, maka buka dalan rasik atu ba oin.

“Ha’u Martinho Germano da Silva Gusmão, nu’udár sidadaun orijinária, ohin deklara ofisialmente no publikamente nu’udár kandidatu ho karáter inkluzaun,” Martinho Gusmão deklara iha sekretariadu Metiaut, Tersa (18/01/2022).

Kandidatu ne’e mós prontu ona maske la hetan bensaun ka tula liman hosi partidu polítiku sira, maibé konfia iha Papa Francisco ho Amu Bispu sira nia apoiu moral, hamutuk ho sarani no kleru sira iha Dioseze Dili, Baucau no Maliana.

Martino Gusmão hateten, razaun kandidata an nu’udár Inkluzaun, tanba durante ne’e laiha partidu, maibé moris hanesan sidadaun baibain, nune’e mós la’ós ema independente.

“Ha’u mai hosi background nu’udár “sacerdote dispensado”, moris durante tinan 23 nu’udár Na’ilulik Igreja Katólika, maibé ha’u sai kandidatu hodi povu nia lian-halerik ne’ebé mós sarani Katólika. Ha’u hatudu estima iha ha’u nia moris ho povu tomak, inklui ho sarani hosi Igreja Protestante no Komunidade Musulmana hanesan ha’u halo beibeik iha tinan barak nia laran. Ha’u sai Prezidente Repúblika iha povu TL nia fuan laran,” nia deklara.

Durante ne’e Martinho Gusmão hakerek barak, ko’alia barak no tun rasik atu tulun líder sira, liu-liu belun foinsa’e sira.

Maibé, sempre hetan liafuan ida ne’ebé todan, “kolu tiha batina mak halo polítika,”. Hanoin naruk no rona barak hosi maluk sira, hosi povu ne’ebé loron ba loron serbí, ikus-mai husu lisensa ba Bispu Baucau no Santo Padre hodi entrega hikas batina tanba hakarak duni tuir saída mak Papa Francisco dehan katak, Mizerikordia nia laran, Igreja tomak sai missaun foun.

Ko’alia ho partidu sira, ki’ik ka boot, no sira hotu ne’ebé sei iha konsiénsia polítika, naroman nabilan fó suporta barak atu halo polítika ho konsiénsia.

Martinho Gusmão fó obrigadu bá Partidu Unidade Dezenvolvimentu Demokrátiku (PUDD), ne’ebé iha korajen atu apoia nia kandidatura no lori prosesu ne’e bá oin.

Nia mós fó obrigadu koléjiu krerikál Igreja Katólika Timor-Leste, konfisaun relijiozu hotu, ba Partidu CNRT ho nia Prezidente, Kay Rala Xanana Gusmão ne’ebé konvida nia iha loron 13 fulan Outubru 2021 ba iha Mehara Munisípiu Lautém, iha loron ne’e mak nia deside atu kandidata an bá Prezidente Repúblika.

Tanba ne’e, tempu badak, Kandidatu Martinho Gusmão sei bá rejista iha Tribunál Rekursu ho apoiante 5.000-resin, tuir kritériu no lei eleisaun Prezidensiál nian.

Prezidente Repúblika Francisco Guterres Lú OLo, liuhosi Dekretu númeru 2/2022, ne’ebé publika ona iha Jornál Repúblika, marka ona data eleisaun prezidensiál nian hodi hili Prezidente Repúblika ba períodu 2022-2027, iha loron 19 fulan-marsu 2022.

Jornalista: Vito Salvadór