Hatutan.com, (12 Janeiru 2022), Díli-Na’in bá mídia online Tempo Timor José António Belo “Taraleu”, atuál Prezidente Konsellu Administrasaun  Rádiu Televizaun Timor Leste, Empreza Públiku (RTTL,E.P) ho jornalista António Sampaio husi Ajénsia Notisioza  Portugés LUSA, sei sai sasin bá kazu  relatóriu Topu Honis ne’ebé deskonfia envolve hosi arguidu padre Hermínio Fátima Gonçalves.  

Notísia iha Relasaun: Kazu Topu Honis, Padre Hermínio Fó Relatóriu ba Xanana no Kongregasaun SVD

Jornalista António Sampaio ho José António Belo “Tarale”. Foto/Respro

Tuir ajenda  julgamentu iha Tribunal Distritál Dili (TDD) katak iha loron 13 fulan-Janeiru ne’e, tuku 9:00 dadeer,  Tribunál sei rona sasin na’in-rua husi Mídia Online Tempo Timor no Jornalista Ajénsia Notisioza Portugés LUSA, António Sampaio.

Kazu relatóriu Topu Honis ne’ebé deskonfia involve Padre Hermínio Fátima Gonçalves no arguidu na’in-tolu seluk, hanesan arguidu José Cardoso Moreira, Andre Gonçalves no Libania Martins Amaral, iha relasaun forte ho  publikasaun relatóriu peskiza ba kazu Topu Honis ne’ebé deskonfia katak mídia rua; Tempo Timor ho LUSA  maka publika uluk.

Jornalista António Sampaio ne’ebé Hatutan.com konfirma liuhusi telefónika, Kuarta (12/01/2022), rekoñese katak, nia parte simu duni notifikasaun husi Tribunal Distritál Dili (TDD), maibé la informa kona-bá kazu saida.

“Ha’u respeita notifikasaun husi TDD, maibé lahatene notifikasaun ne’e ba kazu saida, tanba TDD la informa kona-bá kazu ne’e rasik no la esplika kona-bá prosesu ne’e no tanba sá bolu ha’u, maibé aban dadeer (13/01/2022),  ha’u sei ba Tribunál hodi responde ba pergunta sira ne’ebé TDD sei husu ba ha’u, maibé ha’u la hatene dunik kona-bá kazu saida,” António Sampaio hateten.

Husi sorin seluk, Hatutan.com mós halo konfirmasaun hosi José António Belo “Taraleu”, liuhusi telefónika kona-bá notifikasaun TDD nian ba nia parte nu’udar sasin, maibé José Belo “Taraleu” lakohi fó komentáriu kle’an tanba tenke respeitu ba segredu justisa. 

Notísia iha Relasaun: Relatóriu Topo Honis, Xanana Entrega Ba Barbara Liuhosi Joaquim Fonseca

“To’o agora ha’u seidauk simu notifikasaun husi TDD . Ha’u seidauk bele ko’alia buat ida, maibé bainhira ha’u simu ona notifikasaun mós depois prosesu iha Tribunál maka bele ko’alia, tanba tenke respeitu segredu justisa,” José António Belo “Taraleu” nu’udar na’in ba Mídia Tempo Timor ne’e tenik.

Iha loron 28 fulan-Dezembru 2021, TDD rona ona sasin Kay Rala Xanana Gusmão no tuir ajenda katak iha loron 13 fulan-Janeiru ne’e, Tribunal sei rona sasin husi mídia online Tempo Timor no Jornalista husi ajénsia notisioza LUSA.

CI Konsidera La Adekuadu

Prezidente CI Virgílio Guterres. Foto/CI

Responde ba Hatutan.com liuhusi telefónika, Prezidente Conselho de Imprensa de Timor Leste, Virgílio da Silva Guterres, hateten, se kazu ne’e relasiona ho relatóriu Komisaun Justisa no Paz Dioseze Dili nian, ne’ebé ONG JU,S hatama providénsia kautelar ne’e entaun ko’alia kona-bá segredu justisa ka sijilu profisionál.

Ba asuntu notifikasaun TDD nian ba jornalista António Sampio ho José António Belo “Taraleu”, Conselho de Imprensa konsidera jornalista sira iha kompromisu étiku kona-bá sijilu profisionál, katak jornalista sira sei kompromete atu próteze sira-nia fontes informasaun sira. Tanba ida-ne’e maka jornalista iha direitu bá objesaun konsiénsia, katak jornalista iha direitu labele fó sai fontes sira nia naran ka identidade.

Prezidente órgaun reguladór ba meiu komunikasaun sosiál sira iha Timor-Leste ne’e,  konfirma mós katak, jornalista José António Belo “Taraleu” ho António Sampaio, ka jornalista se de’it, la’ós ajente no nem asistente prosesu judisiál. Katak sira la halo parte iha prosesu investigasaun ka prosesu inkéritu, tanba ne’e, sira la kompromete atu rai segredu justisa.

“Buat ne’ebé mak sira kompromete ne’e mak prinsípiu étiku ka kódigu étiku jornalistika, liuliu off the record no embargo, ne’e mak sira hakru’uk bá.    Tantu, iha asuntu ida-ne’e, arrola jornalista sira sai testemuña mós la adekuadu tanba la’ós jornalista sira mak viola no publikasaun jornalista nian labele konsidera hanesan segredu justisa,” Virgílio Guterres afirma tán.

Nia esplika katak fontes husi publikasaun ida-ne’e kódigu  étiku jornalistika   hateten dehan tenke hetan informasaun ho étiku no kuandu informasaun ne’ebé ba interese públiku nian, jornalista bele uza meius oioin atu bele hetan fontes.

“Ba asuntu ida-ne’e, CI akompaña tanba hetan ona informasaun no se aban hahú duni, CI nia pesoál sira husi apoiu jurídiku sei halo akompañamentu atu haree prosesu ne’e to’o iha ne’ebé,” Virgílio Guterres tenik.   

Pozisaun CI nian ne’e primeiru tanba ne’e notifikasaun husi Tribunál ba jornalista no mós nu’udar sidadaun prontu atu hakru’uk ba notifikasaun ne’e no tenke ba atu sai testemuña.

Buat ida ne’ebé maka  CI tau ne’e maka Timor-Leste rasik iha lei komunikasaun sosiál nu’udar lei ne’ebé uza atu prosesa ka atu halo levantamentu kona-ba kazu sira ne’ebé envolve obra jornalistika.  Tanba ne’e, CI husu atu la bele uza fali lei seluk, kódigu penal ka kódigu prosesu seluk hodi prosesa obra jornalistika.

“Se sira nain rua nia relasaun ne’e sai testemuña ba kazu seluk, ne’e ita akompaña de’it, informasaun saida mak sira atu fó no informasaun saida mak Tribunál hakarak atu hetan hosi sira na’in-rua. Tuir CI nia hanoin, bolu jornalista na’in-rua ba kazu relatoriu Topu Honis ladún adekuadu tanba sira hala’o sira-nia knar profisionál,” Virgílio Guterres subliña tán.

Jornalista: Carmelita Isaac