Hatutan.com, (10 Janeiru 2022), Díli-Ministru Prezidénsia ba Konsellu Ministru  (MPCM, sigla portugés), Fidelis Manuel Leite Magalhães, klarifika katak, mezmu Ministru Justisa, Manuel Cárceres da Costa, la partisipa iha asina akordu entre Oitavu Governu ho kompañia Pelican Paradise, foin lalais ne’e, la signifika iha konflitu interese iha Governu nia laran.   

Notísia iha Relasaun : Arrendamentu Rai ba Pelican Paradise Tinan 50, Vise MJ Kumpre Desizaun KM

Iha loron 05 fulan-Janeiru 2022, Ministru Justisa (MJ), Manuel Cárceres da Costa, deklara katak, nia laiha koñesimentu kona-bá akordu arrendamentu rai ba investimentu Pelican Paradise ne’ebé asina hosi Vise Ministru Justisa (VMJ), José Edmundo Caetano.

Polémika ida-ne’e hamosu perspetiva hosi públiku katak, Ministru Justisa, Manuel Cárceres, iha intensaun ba konflitu entre podér iha akordu asinatura kona-bá arrendamentu rai ba investimentu Pelican Paradise, iha Tasitolu, Díli, to’o tinan 50 no okupa rai ektare 556.  

Ministru Prezidénsia ba Konsellu Ministru (MPCM-Sigla Portugés), Fidelis Manuel Leite Magalhães, konsidera, laiha konflitu interese iha ministériu justisa nia laran tanba  buat ne’ebé asina hosi Vise MJ kompletamente legál.

Ministru Prezidénsia ba Konsellu Ministru (MPCM, sigla portugés), Fidelis Manuel Leite Magalhães. Foto/Media MPCM

“Ami la konsidera ida-ne’e hanesan konflitu ida. Akordu ne’ebé mak vise ministru asina ne’e, kompletamente legál. Tuir orgánika ne’ebé asinadu, kompletamente legál,” Ministru Fidelis Manuel Leite Magalhães, hateten ba jornalista sira iha kuartél jenerál, Fatuhada, Díli, Segunda (10/01/2022).

Notísia iha Relasaun: Ministru Justisa “Fase-Liman” ba Akordu Arrendamentu Rai Pelican Paradise

Kona-bá lei orgánika balu ne’ebé la fó kompeténsia no autorizasaun ba Vise Ministru Justisa (VMJ), José Edmundo Caetano, atu halo asinatura, Fidelis dehan, desizaun ba asinatura ida ne’e mai hosi reuniaun iha Konsellu Ministru hanesan órgaun másimu Governu nian.

“Vise Ministru asina ne’e, tanba orientasaun hosi Konsellu Ministru. Bainhira Konsellu Ministru dehan asina, vise ministru asina. Agora, sé mak asina ne’e, ne’e kestaun seluk ida. Maibé aktu ne’ebé mak halo em-nome do ministru da justisa, ne’e desizaun ne’ebé maka halo hosi Konsellu Ministru,” Ministru Fidelis, afirma tán.

Portavós governu ne’e, haktuir tán, antes ne’e, Konsellu Ministru mós orienta katak, tenke iha lalais konkluzaun, solusaun ba asuntu asinatura entre Governu TL ho empreza kona-bá akordu investimentu Pelican Paradise.

“Ita-boot sira lembra katak, la sala iha loron 17 ka dia hira ida atu asina, depois kansela tiha, adia tiha, depois la asina. Depois saida mak Konsellu Ministru dehan katak, tenke asina lalais. O que sertu maka asina, no asinatura monu ba iha dia 03 janeiru, no bainhira antes asinatura ne’e hahú, iha ona reuniaun konsellu ministru semana ida antes, ne’ebé maka dehan, tenke avansa lalais. Saida maka feitu, feitu ona,” Ministru Fidelis Magalhães haktuir.

Ministru Fidelis mós lakohi komenta kona-bá deklarasaun ne’ebé antes ne’e Ministru Justisa, Manuel Cárceres, fó sai. Maibé nia  kompromete katak, iha tempu besik, sei fó solusaun ba Primeiru Ministru (PM), Taur Matan Ruak. Tanba ninia kna’ar mak atu fó garantia ba desizaun hotu-hotu hosi KM  tuir lei.

“Ha’u la komenta ida ne’e, ha’u hatene, hanesan ministru do prezidénsia do konsellu ministru, iha knaar ida de’it, mak garante ezekusaun hotu-hotu ho loloos, ba desizaun hotu ne’ebé mak Konsellu Ministru halo konforme lei,” Fidelis hateten.

Akordu Anteriór Vigor Hela

Informasaun seluk ne’ebé Hatutan.com asesu hosi fonte besik Ministru Justisa, Manuel Cárceres da Costa, informa katak, Ministru Manuel Cárceres da Costa, lakohi asina akordu arrendamentu rai  ho ektare 556 ba arrendatáriu Pelican Paradise tanba akordu anteriór válidu ka vigór hela.

Informasaun seluk tan katak dezde akordu ne’e estabelese iha tinan 2010 to’o agora arrendatáriu Pelican Paradise la selu taxa arrendamentu nian. Tanba ne’e, Ministru Justisa Manuel Cárceres, mantein pozisaun hodi reklama atu Pelican Paradise kumpre lai nia devér selu  rai-ten durante tinan 11 (2010-2021) maka foin bele halo fali akordu arrendamentu foun.  

Jornalista: Rogério Pereira Cárceres