Hatutan.com, (21 Dezembru 2021), Díli—Ministériu Koordenadór ba Asuntu Ekonómiku (MKAE), liuhosi Autoridade Inspesaun no Fiskalizasaun ba Atividade Ekonómika Sanitária no Alimentár, Empréza Públika (AIFAESA I.P), deteta empreza rua ne’ebé hala’o distribuisaun no komersializasaun iha kapitál Dili, komete kríme Asambarkamentu no Espekulasaun, tanba fa’an sasan la tuir presu normál.

AIFAESA,I.P, liu hosi Departamentu Operasaun, Departamentu Metrolojia Padronizasaun hamutuk ho Polísia Serbisu Investigasaun Kriminal (PNSIK), hala’o kontrolu ba presu produtu aihan hanesan foos, mina, terigu, masin-midar no seluk tan, inklui presu materiál konstrusaun iha loja distributór sira iha Díli, (16/12/2021). Foto/AIFAESA.I.P.

Atividade inspesaun refere implementa hodi halo kontrolu ba kualidade no presu ba produtu alimentár sira iha Loja Distributór Alimentisius no Loja Distributór Materiál Konstrusaun sira iha Munisípiu Díli ne’ebé aposta hosi Postu Administrativu Dom Aleixo, Vera Cruz, Na’in-Feto, durante loron (2), hahú hosi loron, 15 to’o 16 Dezembru 2021.

Notisia iha Relasaun:AIFAESA Kontinua Hala’o Inspesaun Regulár iha Díli

Rezultadu hosi atividade inspesaun no fiskalizasaun ne’e rasik, ekipa inspesaun halo kontrolu ba empreza hamutuk (9), ne’ebé maka halo Distribuisaun no komersializasaun ba produtus alimentár no la’ós alimentár.

Totál estabelesimentu inspesionadu iha Munisípiu Díli, kompostu hosi, Empréza distribuidór nesesidade bázika lima (5), no Empréza distribuidór materiál konstrusaun haat (4).

“Hosi rezultadu inspesaun no fiskalizasaun presu ba estabelesimentu (5) ne’ebé fa’an produtus alimentisius nian, iha estabelesimentu tolu (3) maka fa’an ho presu normál. Maibé, iha estabelesimentu ida (1) maka fa’an produtus nesesidade bázika ho presu ne’ebé la normál hodi viola, DL.Nu. 29/2011 de 20 de Junho kona-bá presu justu no Lei Nu. 4/2011, 1 de Junho kona-bá Krimes de Asambarkamentu no Espekulasaun,” Inspetór Jeral AIFAESA I.P, Ernesto Monteiro, haktuir iha karta komunikadu ne’ebé hatutan.com, asesu iha tersa (21/12/21). 

Iha mós estabelesimentu ida (1) maka la kopera ho AIFAESA, I.P., tanba la entrega presu produtu ne’ebé fa’an hosi empreza refere.

Nune’e mós hosi rezultadu inspesaun no fiskalizasaun ba estabelesimentu haat (4) ne’ebé fa’an material konstrusaun nian, iha estabelesimentu tolu (3) maka fa’an ho presu ne’ebé normál, no iha empréza ida mak faan materiál konstrusaun, la tuir présu normál.

“Iha estabelesimentu ida (1), maka fa’an material konstrusaun ho presu ne’ebé la normal hodi viola, DL. Nú.29/2011 de 20 Junho kona-bá presu justu no Lei Nu. 4/2011, 1de Junho kona-bá Krimes de Asambarkamentu no Espekulasaun,” Ernesto Monteiro, informa tán.

Hosi infrasaun tolu ne’e rasik, rua mak kategoria hanesan krime, Konforme ba Lei Nú. 4/2011 de 1 Junho kona-bá Krimes de Asambarkamentu no Espekulasaun.

Tanba ne’e, AIFAESA sei remete ba Ministériu públiku hodi prosesa tuir kompeténsia ne’ebé sira iha, ligadu ba kategoria hanesan infrasaun administrativa nian.

AIFAESA sei prosesa tuir kompetensia ne’ebé atribui mai AIFAESA, hodi prosesa tuir Dekretu-Lei Nu. 23/2009, de  5 Agostu, kona-bá Regime Infrasoens Administrativa Kontra Ekonómia no Seguransa Alimentár.

Autoridade Inspesaun no Fiskalizasaun ba Atividade Ekonómika Sanitária no Alimentár I.P., ne’ebé designadu ho naran AIFAESA, I.P., hanesan institutu públiku ida ne’ebé estabelese tuir DKL. Nú. 26/2016, Juñu, hodi tutela ba Ministru Koordenador ba Assuntus Ekonómikus (MCAE), ho misaun atu proteje konsumidor, no promove konkorésia leal entre operadór ekonómiku sira iha teritoriu nasionál, kontrolu atividade ekonómika sira no garante kualidade produtu ba saúde públiku sira hosi atividade inspesaun no fiskalizasaun rutina ne’ebé hala’o iha teritoriu Timor Laran tomak.

Objetivu hosi atividade inspesaun no fiskalizasaun ba ne’e atu garante nafatin kualidade produtu alimentusius ba konsumu públiku no normaliza nafatin presu produtus nesesidade bázika ho material konstrusaun hodi nune’e empreza sira labele pratíka espekulasaun ba presu  iha periodu Natal no Tinan Foun.

Iha atividade intervensaun ne’e ekipa inspesaun AIFAESA, I.P., mós kolabora ho ekipa hosi Polisia Nasionál Timor Leste (PNTL), liu hosi Diresaun Servisu Investigasaun Kriminal (SIK), ba hala’o  inspesaun no fiskalizasaun ba estabelesimentu sira ne’ebé hala’o atividade komersial hodi fa’an produtus alimentár no laos alimentár hodi hare ba presu ai-han no material konstrusaun ne’ebé fa’an ba públiku iha kapitál Díli.

Jornalista: Rogério Pereira Cárceres