Hatutan.com, (14 Dezembru 2021), Díli—Prezidente Repúblika (PR), Francisco Guterres Lú Olo, sei hala’o diálogu ho autoridade no reprezentante komunidade iha munisípiu Bobonaro iha loron 15 Dezembru 2021 no iha  Liquiça, iha 17 Dezembru 2021.

Prezidente Repúblika (PR), Francisco Guterres Lú Olo. Foto/Média PR.

“Diálogu iha munisípiu rua, Prezidente Repúblika sei esplika kona-bá situasaun polítika rai-laran no rona preokupasaun hosi autoridade lokál, organizasaun sosiedade sivíl, veteranus, konfisaun relijioza, foin-sa’e no estudante kona-bá prosesu dezenvolvimentu iha nível nasionál no lokál,” Komuniakdu hosi Palásiu Prezidensiál Nicolau Lobato, Díli, (13/12/2021).

Notísia iha Relasaun:Labele Jeneraliza Veteranu Hada’u-malu Projetu

Prezidente Repúblika sei akompaña hosi membru VIII Governu Konstitusionál atu hatán ba preokupasaun hosi reprezentante sira iha kada munisípiu.

Ba oin,  órgaun ezekutivu bele halo esforsu oinoin hodi responde asuntu ne’ebé autoridade lokál, líder komunitária sira foti iha diálogu.

Prezidente Repúblika sei husik Díli ba munisípiu Bobonaro, iha 14 Dezembru 2021, no sei filafali mai sidade kapitál, iha 18 dezembru 2021.

Prezidente Repúblika sei presta omenajen ba erói no martires libertasaun Pátria iha Osoáriu Maliana no Liquiça, kuda ai-simbolikamente no entrega ai tokon ida resin ba reprezentante hosi munisípiu 12 no Rejiaun Administrativa Espesiál Oecusse-Ambeno (RAEOA), nu’udár parte hosi kampaña ne’ebé Xefe Estadu inisia “Sidadaun Ida, Ai-oan Ida”.

Molok ne’e, Prezidente Repúblika hala’o ona vizita traballu ba munisípiu Viqueque, Covalima, Lautém, Baucau, Ermera, Manufahi no Ainaro.

Jornalista: Rogério Cárceres