Hatutan.com, (09 Dezembru 2021) Díli– Tribunál Distritál Díli (TDD), Kinta (09/12/2021), tuku 14:00 Otl, hala’o primeira interrogatóriu ba arguidu na’in-ualu (8) ne’ebé deskonfia foti-subar riku-soin matebian Cirilo Cristóvão, eis Ministru Defeza.

Membru PNTL-SIKN (Servisu Investigasaun Kriminál Nasionál) kontinua foti sasán evidénsia ba Kazu krime furtu agravadu ho Nuc. 22/21.PGGCC iha rezidénsia arguidu balun nian iha área Tasi Tolu, Díli. Foto/PNTL

Arguidu na’in-ualu ho inisiál GADS, AVR, RJC, OVR, TSX, MDFA, OCX no DAJL ne’e, Ministériu Públiku aplika krime furtu agravadu ne’ebé previstu iha artigu 252 Kódigu Penál Timor-Leste  tanba deskonfia foti-subar matebian eis Ministru Defeza nia riku-soin.

Arguidu na’in-ualu  to’o iha TDD purvolta tuku 14:00 akompaña ho arguidu sira-nia advogadu no família balun.

Informasaun ne’ebé Hatutan.com rekolla husi advogadu arguidu sira-nian katak arguidu sira ne’e Polísia Nasionál Timor-Leste (PNTL)- Servisu Investigasaun Kriminál Nasionál (SIKN) detein  iha idak-idak nia hela fatin, hanesan iha áre Becora, Mandarin, Delta II, Surikmas no Tasi Tolu, bazeia ba mandadu husi TDD ho NUC 22/21 PGGCC no halo apreensaun mós sasán sira, hanesan karreta, motór no konta bankária, tanba arguidu sira ho meius oioin foti-subar matebian nia riku-soin no laiha koñesimentu hosi matebian nia kaben Brigida Correia.  

Arguidu hirak ne’e PNSIK detein durante oras 72 nia laran, hafoin submete ba primeiru interrogatóriu ne’ebé prezide husi juiz singular Ivan Suritay, Ministériu Públiku reprezenta husi Prokuradór Matias Soares no arguidu sira hetan asisténsia legal husi advogadu privadu na’in-tolu.

Jornalista: Carmelita Isaac