Hatutan.com, (30 Novembru 2021), Dili—Governu liuhosi Ministériu Interiór (MI), Servisu Migrasaun (SM), ameasa sei lori sidadaun na’in 700-resin ne’ebé antes ne’e hakat ilegál hosi fronteira terrestre, ba Ministériu Públiku (MP), tanba to’o oras-ne’e, seidauk kumpre sansaun administrativa ka selu multa ba Estadu.

Diretór jerál Servisu Migrasaun, Superintendente Asistente Polísia, Luis Barreto. Foto/Hatutan.com.

Diretór jerál Servisu Migrasaun, Superintendente Asistente Polísia, Luis Barreto, hateten sidadun na’in-700-resin ne’e, hakat ilegál hosi fronteira Timor-Leste ba nasaun viziñu Indonézia, hodi tuir atividade arte marsiál. Maibé, ikus-mai autoridade Indonézia nian, kompostu hosi Polísia Repúblika Indonézia (POLRI) ho Migrasaun halo detensaun deporta kedan mai TL.

Notísia iha Relasaun:Deskobre fukun-sira fó espasu ba pasajen ilegál buras iha fronteira

Bainhira to’o iha TL, sidadaun hirak-ne’e mós kumpri ona regra hosi Ministériu Saúde (MS), hodi kumpre iha kuarentena durante loron 14, hafoin entrega ba Servisu Migrasaun atu hala’o kompeténsia tuir lei, liu-liu aplika multa.

Iha prosesu selu multa ne’e, sidadaun hamutuk na’in 50-resin mak selu ona multa ba Estadu no balun seidauk selu to’o agora. 

Sidadaun ne’ebé mak to’o oras ne’e sei seidauk selu, ka la kumpre sansaun administrativa ne’ebé servisu migrasaun fó-sai maka, sei kondena sira atu tenke selu multa.

“Maibe sira la kumpre, ami lori kazu ne’e ba iha MP mak sei lori ba iha Tribunál, hodi foti desizaun. Agora dadaun, ami prepara ona dokumentu, kontaktu ona ba MP hodi entrega kazu ne’e,” Superintendente Asistente Polísia, Luis Barreto, hateten ba jornalista sira iha kna’ar fatin Ministériu Interiór, Vila Verde, Tersa (30/11/21).

Tuir lei, prazu tempu ne’ebé fó ba sidadaun sira ne’e, maka, primeiru aplika uluk ba loron sanulu. Maibé, bainhira seidauk kumpre nafatin, maka Migrasaun sei notifika sira ba loron sanulu tán.

Tuir dekretu Governu númeru 18/2021, kona-bá medida sira ba ezekusaun Estadu emerjénsia nian, katak, sidadaun sira ne’ebé tama iha territóriu TL mak la respeita ba regra, sei hetan sansaun administrativa ka multa ho valór osan hosi dolár $30 to’o $259.

Maibé, tanba konsidera aktu hakat illegál hosi fronteira iha tempu Estadu emerjénsia ho pandemia global COVID-19, ne’e kategória krime gráve, nune’e sidadaun sira, migrasaun aplika ho koima hamutuk $250 ba hotu-hotu.   

Superintendente Asistente Polisia, Luis Barreto, husu ba sidadaun sira hotu katak, iha tempu besik Natal no tinan foun ne’e, bainhira hakarak atu halo viájen ba iha estranejeiru, hanesan ba Indonézia ka ba liu nasaun seluk, tenke haree dokumentu sira hanesan pasaporte tenke válidu.

Jornalista: Rogério Pereira Cárceres