Hautan.com, (23 Novembru 2021), Díli-Portavós komandu Polísia Nasionál Timor-Leste (PNTL), Superintendente Xefe Arnaldo de Araújo, informa, komandu PNTL  kontinua prosesa kazu insidente ne’ebé akontese iha resintu Federasaun Futeból Timor-Leste (FFTL), tanba konsidera nu’udár krime públiku.

Notísia iha Relasaun: Oan-Feto Hosi Prezidente FFTL Konsidera Notísia Hatutan Inventa no HOAX

Karreta ne’ebé baku rahun iha insidente iha resintu FFTL lori ba asegura iha Komandu PNTL, maibé família ba foti tiha ona hodi lori ba hadi’a iha ofisina hodi rezolve kazu ne’e tuir dalan família. Foto/Espesiál

Portavós Arnaldo de Araujo informa, andamentu investigasaun ba kazu insidente iha resintu FFTL ne’e, PNTL liuhosi komandu Munisipiu Díli mak halo atendimentu.

Insidente iha resintu FFTL ne’e akontese iha Domingu dadeer (07/11/2021), tuku 06:00 Otl,  ne’ebé rezulta karreta Nisan kór metan ho númeru matrikula A.22-765 hetan estragus.

Karreta ne’e baku-rahun hosi prezidente FFTL, Francisco Jerónimo nia alin-rasik no na’in ba karreta ne’e maka Xefe Gabinete Prezidente FFTL nian ho inisiál MF.  

“Sim, ida ne’e komandu PNTL Munisípiu Díli maka haree kazu ida-ne’e, no ha’u hanoin prosesu ne’e hala’o tiha ona, kuandu iha kazu ka asaltu malu, kuandu halo krime, hakarak ka lakohi tenke halo prosesu. Kuandu iha vítima, keixa, komandu sei labele taka,” Portavós Komandu PNTL Superintendente Xefe  Arnaldo de Araújo, hateten ba jornalista sira liuhosi konferénsia imprensa iha Kuartél Jerál PNTL, Caicoli, Díli, Kuarta (24/11/21).

Hafoin insidente ne’e akontese, parte vítima lori kedas evidénsia hanesan karreta Nisan kór metan ho númeru matrikula A.22-765 hetan estragus ne’e ba hato’o keixa iha Polísia Nasionál Servisu Investigasaun Kriminál (PNSIK) iha Komandu PNTL Caicoli. Maibé, ikus mai rona dehan katak, evidénsia ne’e rasik PNSIK entrega fila ona ba família atu hadi’a, no kazu ne’e sei rezolve tuir dalan família.

“Ha’u hanoin, ne’e komandu Munisípiu Díli mak kaer kazu ida-ne’e, nia mak hakle’an liu kona-bá asuntu ida ne’e, tanba sá mak nia fó fila-fali prova krime públiku ne’e ba família.  Ha’u hanoin ita-boot sira bele ba husu iha komandu Munisípiu Díli para bele esplika nia kronolojia loloos,” Superintendente Xefe Polísia Arnaldo de Araújo hateten.

Maske nune’e, Portavós Komandu PNTL ne’e informa tán katak, faze investigasaun PNTL nian rasik, antes ne’e komandu bolu ona vítima ho sasin sira no fó ona mós deklarasaun kona-bá hosi insidente refere.

“Ha’u hanoin sira hala’o tiha, andamentu prosesu ne’e bolu ona sasin sira no bolu ona vítima, hodi bele hato’o kona-bá asuntu ida-ne’e. Ha’u hanoin komandu Munisípiu Díli sei la husik hela, sira hala’o tiha ona. Ita hein katak iha tempu badak, andamentu prosesu ne’e para ita hotu bele hatene no iha transparénsia ba ema hotu,” Arnaldo de Araújo hateten.

 Jornalista: Rogério Pereira Cárceres