Hatutan.com, (16 Novembru 2021), Díli-Membru Komité Ezekutivu (Exco)  Federasaun Futebol Timor-Leste (FFTL) hamutuk ho prezidente asosiasaun futeból 14, tersa  (16/11/2021), halo reuniaun durante oras haat liu hodi ko’alia kona-ba dezenvolvimentu instituisaun nian.

Lee mós notísia ne’e: Exco FFTL Sei Organiza Enkontru Foti Desizaun Ba Kazu Prezidente Francisco Jeronimo

Situasaun iha FFTL, Tersa kalan (16/11/2021), iha ámbitu reuniaun Exco FFTL. Foto/Hatutan.com

Reuniaun Exco FFTL ne’ebé  hala’o iha Xanana Sport Centre, hahú tuku 4:00 loro-kraik to’o tuku 8 liu minutu balun, kalan, lao ho kondusivu, nune’e, hafoin remata reuniaun ne’e, Vise-Prezidente FFTL, Falur Rate Laek,  lia-tun dehan,  reuniaun ne’e la diskute kona-bá kazu ka insidente ne’ebé akontese iha resintu FFTL, maibé halo de’it avaliasaun interna ba servisu sira ne’ebé ligasaun ho atividade desportu ka futeból nian.

Insidente ne’ebé akontese iha resintu FFTL, Domingu (07/11/2021), tuku 06:00 madrugada, rezulta karreta Nisan metan ida ho númeru matrikula  A.22-765, rahun tanba baku-rahun husi família rasik prezidente FFTL nian hosi Liquiça.

Informasaun ne’ebé antes ne’e fó sai katak reuniaun ne’e nu’udar pedidu hosi membru Exco FFTL nian atu prezidente FFTL bele konvoka reuniaun ida hodi buka solusaun ba insidente ne’ebé akontese iha FFTL tanba iha relasaun ho família prezidente FFTL nia

“Enkontru ne’e, ami rezolve problema internu, sasán sira ami nian, monta prosesu, foti desizaun sira ne’e, métodu servisu sira ne’e, ami nia sala iha ne’ebé, ami hadi’a para korrije, halo nusa para bele lori prosesu dezenvolvimentu bola ne’e ba oin,” Falur Rate Laek, informa ba jornalista sira hafoin enkontru Exco ne’e.

Falur Rate Laek hateten, insidente ne’ebé akontese iha resintu FFTL, domingu liubá, kazu krime públiku tanba ne’e, tuir nia, labele atu kahur  ka mistura ho servisu FFTL nian. 

Lee mós notísia ne’e: Insidente iha Resintu FFTL, Francisco Jerónimo Sei Hato’o Keixa ba Tribunál

“Akontesimentu ne’ebé ne’e, ha’u lahatene. Buat krime nian ne’e, labele mistura fali krime, rona ka lae. Maibé, prosesu ba tomada desizaun iha FFTL nian, ami haree ida-ne’e, métodu de traballu dirasaun, ne’e ami haree ida ne’e. Agora, prosesu ne’ebé krime ne’e, ami la to’o iha ne’ebá,” Falur Rate Laek hateten tan.

Atuál Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Major Jenerál Falur Rate Laek, afirma katak, Francisco Jerónimo, kontinua lidera nafatin FFTL nu’udár prezidente.

Kona-bá servisu sira mak oras ne’e iha FFTL nia laran, nia fiar katak ba oin funsionamentu servisu sira hotu tenke la’o ho di’ak.

“Ida ne’e importante, ita boot sira buka para atu funsionamentu iha FFTL ne’e, la’o ba oin ne’e di’ak to’o ita kompetisaun sira ne’e, la’o di’ak hotu ne’e, mak ida ne’e. Depois ohin ami preparadu para anunsia, para depois fulan-Fevereiru 2022  bele halo kongresu, saida sira ne’e hotu ne’e, ami ko’alia ida ne’e,” Falur Rate Laek akresenta tán.

Iha fatin hanesan, Prezidente FFTL, Francisco Martins da Costa Pereira Jerónimo, hatutan, iha enkontru ne’e, parte Exco sira ko’alia kona-bá servisu administrasaun ne’ebé la’o iha FFTL laran, sira ko’alia ho unánimu katak, la’o ho di’ak no familiar.

“Tanba família bola no saida mak akontese, laiha ninia efeitu ida, tanba ne’e mak ami foti desizaun hotu,” Prezidente FFTL atuál Ministru Asuntu Parlamentár no Komunikasaun Sosiál (MAPKOMS) ne’e tenik.

Ba desizaun sira ne’e, maka parte membru Exco sira mós laiha hanoin ka desizaun ruma atu hasai (espulsa) funsionáriu  ruma iha FFTL laran.

“Ami la ko’alia saida…, laiha, ne’e nein uitoan mós laiha, hotu ona. Loos ona. Ami laiha espulsa tanba saida, hanesan ohin ha’u dehan katak, familiar, família bola, iha problema, tuur hamutuk fó solusaun no solusaun ohin loos hotu ona, no hotu-hotu simu malu hanesan maun-alin, hanesan família bola,” Francisco Jerónimo hateten.

Jornalista : Rogério Cárceres