Hatutan.com, (21 Outubru 2021), Díli– Prezidente Eletrisidade Timor-Leste, Empreza Públiku (EDTL,E.P)  nia saláriu mensal $6.500, nune’e mós saláriu mensal Prezidente  Bee Timor-Leste, Empreza Públiku (BTL,E.P) $6.000.

Dekretu Governu Nu.10/2021. Foto/Repro

Saláriu mensal Prezidente  EDTL,E.P ho BTL,E.P nian ne’e boot liu saláriu mensal no abonu Prezidente Repúblika nian.  

Tuir Lei Nu.14/2019, 21 Outubru, Kapítulu II (Prezidente Repúblika) iha artigu 4, kona-bá Remunerasaun Prezidente Repúblika nian iha númeru 2 mensiona Prezidente Repúblika simu saláriu mensal $2.500 no iha númeru 3 fó direitu ba Prezidente Repúblika kona-bá direitu abono ba despeza ka allowance ho nia valór 100% hosi nia saláriu báziku  ($2.500) ho nune’e, total kada mensal Prezidente Repúblika hetan $5.000.

Saláriu mensal Prezidente EDTL,E.P nian ne’e bazeia ba dekretu lei nu.10/2021, artigu 2 remunerasaun mensal ílikidu ba Prezidente Komisaun Ezekutivu EDTL, E.P ho montante $6.500, no ba vogais Komisaun Ezekutivu EDTL E.P ho saláriu mensal ilikidu $6.000.

Ba saláriu mensal ne’ebé boot liu Prezidente Repúblika ne’e, Hatutan.com halo konfirmasaun direita ho Prezidente EDTL, E.P, Paulo da Silva,  maibé nia parte rejeita atu fó klarifikasaun no komentáriu tanba nia argumenta de’it katak saláriu mensal ne’ebé nia hetan tuir dekretu Governu ne’ebé deside husi Konsellu Ministru.

“Ha’u la fó komentáriu kona-ba saláriu, maibé atu dehan d’eit katak ha’u nia saláriu ne’e aplika tuir dekretu Governu ne’ebé deside husi Konsellu Ministru tanba ida-ne’e refleta ba nivel  responsabilidade, esperiénsia no koñesimentu ne’e mak halo Governu deside saláriu ida-ne’e, tanba ne’e konsulta ho Governu,” Prezidente EDTL, E.P, Paulo da Silva responde Hatutan.com  hafoin hala’o enkontru ho Primeiru-Ministru (PM)  Taur Matan Ruak iha Palacio do Governo, Kinta (21/10/2021).

Iha dekretu Governu nu 8/2021, artigu 2 sita katak remunerasaun mensal iílikidu ba Prezidente Ezekutiva BTL, E.P ho montante  $6.000 no ba Vogais Konsellu Ezekutivu BTL. E.P ho saláriu mensal ilikidu $5.000

Dekretu Governu Nu.8/2021. Foto/Repro

Tuir artigu 3 ba membru Konsellu Administrasaun no Konsellu Fiskál BTL,E.P iha direitu ba senhas prezensa iha kada reuniaun ho montante $150.

Prezidente BTL, EP, Carlos Peloy dos Reis, esklarese la’ós nia parte mak foti desizaun ba saláriu ne’ebé sira hetan kada fulan.

“Ami la halo desizaun rasik ba ami nia saláriu, maibé ida-ne’e desizaun polítika, tanba ne’e ha’u entrega ba polítika sira mak ko’alia, tanba ami tékniku ne’e hein hala’o de’it serbisu,” Carlos Peloy tenik.

CAC Sei Koordena ho CFP no MF “Armoniza” Saláriu FP

Iha sorin seluk, Adjuntu Komisáriu Komisaun Anti-Korrupsaun (CAC), Luis Oliveira Sampaio, deklara katak, ba futuru sei halo koordenasaun serbisu ho Komisaun Funsaun Públika (CFP) no Ministériu Finansas (MF), hodi kontrola ka armonizasaun ba funsionáriu Estadu sira-nia saláriu mensal ne’ebé iha pratika atuál hatudu katak iha balun nia saláriu boot liu Prezidente Repúblika (PR) nian.

Durante ne’e, tuir Komisáriu Adjuntu  CAC ba Asuntu Prevensaun no Sensibilizasaun  ne’e  rona duni informasaun katak, iha funsionáriu balu mak nia saláriu aas liu titulár sira nasaun TL nian.

CAC rasik mós preokupa duni tanba  iha artigu hosi lei balu, bandu katak kualkér instituisaun públiku sira, entidade públiku sira, nia saláriu labele ultrapasa saláriu Prezidente Repúblika nian.

“Ita rona duni informasaun ne’e, mais hanesan ohin ha’u temi, parese ba futuru ami sei haree sasán ida-ne’e. Mais realidade ida-ne’e akontese hela, no parese ita sei iha planu atu haree ida-ne’e, mais ita presiza halo koordenasaun boot, tanba ne’e labele CAC mesak, presiza mós Komisaun Funsaun Públika, Ministériu Finansas, no parese ida ne’e hanesan ideia ida para ita atu ko’alia ho lejizladór sira atu revé fali lei sira ne’ebé mak iha tiha ona,” Luis Oliveira Sampaio hateten.

Jornalista : Carmelita Isaac/Rogério Cárceres