Hatutan.com, (19 Outubru 2021), Díli—Tuir oráriu, Tersa loraik (19/10/2021),   tuku 18:00 oras Dubai, delegasaun Timor-Leste (TL) hamutuk ema na’in 120 husik hela Expozisaun Dubai 2020,  hodi fila hikas mai TL.

Notísia iha Relasaun : Eskluzivu: Joseph Issa Hosi Lebanon Nu’udár Komisáriu Jerál TL ba Expo Dubai

Loron tuir mai, Kuarta (20/10/2021), membru Governu  na’in-hitu mós fila hikas mai Timor-Leste hafoin hala’o serbisu Estadu nian durante loron hitu (7) iha Dubai, Uniaun Emiradu Árabe (UEA).

Membru Govenu sira ne’ebé lidera hosi Ministru MKAE, Joaquim Amaral halo ankontru bilateral iha Dubai. Foto/Espesiál

“Ohin, balun sai uluk ona hosi Dubai, fila ba Timor no aban tuku 08:00 dadeer oras Dubai, Ministru sira mós fila ona ba TL. Iha loron 21 fulan-Outubru, sira fila hotu ona ba Timor no ita hein katak, sira bele fila ho di’ak,” Vise-Komisáriu Jerál Expo 2020 Dubai-Timor Leste, Arif Abdullah Sagran, hateten hodi responde Hatutan.com, via telefónika.

Ministru na’in-hitu ho delegasaun ne’ebé kompostu hosi ema na’in 120 mak ohin ho aban fila ona mai TL, inklui Koordenador Jerál Expo Dubai-Timor Leste, Manuel Vong.

Ba oin, iha ema  na’in 14 de’it mak sei kontinua nafatin hela iha Dubai, inklui Arif Abdullah Sagran, to’o enserramentu espozisaun Dubai 2020.

DSA ba Delegasaun ho Governante Sira

Lei Ezekusaun Orsamentu Jerál Estadu (OJE) 2021 kona-bá perdiam viajen Estranjeiru nian Timor-Leste adopta tuir International Civil Service Commission, DSA Circular ICSC/CIRC/DSA/556, mensiona katak, perdiam viajen ba estranjeiru ba Uniaun Emiradu Árabe (UEA), espesialmente ba Bubai ho kada ema iha direitu ba DSA loron ida $370.

Hosi númeru delegasaun ne’e ho halo kalkulasaun katak, estadia ema na’in 120 durante loron hitu hahú hosi loron 14 to’o loron 21 fulan-Outubru 2021, iha Dubai, Estadu gasta osan ba sira nia perdiam  hamutuk $310.800.

Aumenta tan ho membru Governu na’in hitu (7) $15.190, ho total $325,990 durante semana ida iha Dubai. Ida ne’e la konta ho na’in 14 ne’ebé hela permanente durante fulan neen iha Dubai.

Komemorasaun no Enkontru Bilaterál

Iha loron 18 fulan-Outubru Expo Dubai 2020, hala’o komemorasaun ba loron nasionál Timor-Leste nian no durante loron ida tomak nasaun hotu-hotu ne’ebé partisipa iha Expo ne’e hasa’e Bandeira Nasionál Timor-Leste (TL), no buat hotu la’o ho di’ak ne’ebé hahú kedan ho kanta Hino Nasionál Patria, Patria!

Durante minutu 35 nia laran, Ministru Koordenadór Asuntu Ekonómiku (MKAE), Joaquim Amaral, Ministru Transporte no Komunikasaun (MTK),  José Agostinho da Silva, Ministru Turizmu (MT), José Lucas do Carmo da Silva, Ministru Petróleu no Minerais, Victor da Conceição Soares, Ministru Agrikultura no Peskas, Pedro dos Reis, Vise-Ministru Turizmu, Komérsiu no Indústria, Domingos Lopes Antunes no Vise-Ministru Negósiu Estranjeiru no Kooperasaun (MNEK), Julião da Silva, kontinua hala’o enkontru bilaterál ho UEA.

Ida ne’e hanesan enkontru inísiu entre nasaun ne’ebé iha kompromisu  atu hametin tan relasaun iha setór ekonomia (diplomasia ekonomia), no iha enkontru ne’e MKAE hato’o programa prinsipál haat atu estabelese iha área transporte, turizmu, agrikultura no petróleu.

Parte Dubai responde ho di’ak katak, dezenvolvimentu ekonomia Dubai mak di’ak liu ona iha mundu, tanba sira nia dezenvolvimentu la’o ona durante tinan 50 nia laran. Tanba ne’e maka, Dubai fó pedidu ida ba TL katak, bainhira hakarak atu hamutuk iha kooperasaun diplomasia ekonomia ida-ne’e maka Dubai hakarak atu lori TL hahú hosi porsentu 60 ne’ebé Dubai halo tiha ona, no la’ós hahú hosi kraik liu.

“Ida ne’e di’ak tebes tanba Dubai hakarak hatudu no fahe esperiénsia, nune’e Timor-Leste bele la’o lais liután ba oin iha dezenvolvimentu setór ekonomia. Tanba ne’e maka TL tenke hadi’a ona lei investimentu atu bele fasilita investor sira bele tama mai hodi investe iha TL no TL tenke ajusta ho evolusaun no dinámika mundu globál ne’ebé lais liu,” Arif Sagran haten.

Membru Governu nain hitu ho delegasaun ema na’in 120 ne’e  dezloka  ba Expo Dubai iha loron 14 fulan-Outubru no komesa fila dadaun ona mai Timor-Leste.

Molok ne’e, iha loron 13 fulan-Setembru, Ministériu Turizmu, Komérsiu no Indústria (MTKI), hamutuk ho Autoridade Nasionál TL ba Expo Dubai 2020, husik delegasaun hamutuk na’in 14, arranka uluk ba Dubai, Emiradu Árabe Unidu, hodi halo preparasaun no tuir planu ekipa ne’e sei hela iha Dubai to’o enserramentu espozisaun.

Espozisaun ne’e realiza ona iha loron 01 fulan Outubru 2021 to’o 31 Marsu 2022, no TL partisipa hodi aprezenta produtu 50-resin no komersializa produtu 100-resin kompostu hosi produtu agríkola, artezanatu, minerál no tais.

Iha espozisaun ne’e mós TL hetan espasu espesiál gratuita ba aprezentasaun ho nia luan metru 250. Área ba espozisaun ne’e iha ektare 438 iha Dubai exebition Center  ne’ebé partisipa hosi nasaun 192 hosi mundu tomak.

Orsamentu ba preparasaun expo Dubai mai hosi Orsamentu Jerál Estadu (OJE) 2021, ho totál millaun $1-resin (30%) no millaun $2-resin ho nia ekivalénsia 70% nu’udár apoiu hosi estranjeiru.

Jornalista   : Cipriano Colo