Hatutan.com, (07 Outubru 2021), Díli– Tribunál Distritál Díli (TDD), Kinta (07/10/2021),  liuhusi primeiru interrogatóriu aplika medida koasaun Termu Identidade Rezidénsia (TIR) ba membru PCIC (Polísia Sientífika Investigasaun Kriminál) ho inisiál ATS, tanba komete krime obstrusaun ba autoridade públika.

Iha Kódigu Penál  Timor-Leste (KP-TL) Kapítulu V kona-bá Kontra Autoridade Publika iha Artigu 243 Obstrusaun ba Autoridade Públika 1 – Sé mak liuhosi violénsia ka ameasa maka’as kontra funsionáriu ka ema husi forsa militár nian, militarizadu ka polisiál sira, bainhira opoin ba prátika asaun ka’it ho ezersísiu ninia funsaun sira ka bandu ba prátika asaun kontráriu ba ninia devér sira sei kondena ho pena prizaun husi tinan rua (2) to’o  tinan neen (6).

 2 – Bainhira asaun ne’ebé temi tiha iha númeru anteriór pratika efetivu ka bandu atu pratika maka sei kastigu ho pena tinan rua (2) to’o  tinan ualu (8).

Tribunál Distritál Díli  konsidera medida TIR ba arguidu membru PCIC ne’e adekuadu hodi asegura prosesu investigasaun no halo identifikasaun.

Tuir kronolojia katak iha loron 04 fulan-Outubru, tinan ne’e, PNTL halo operasaun hodi identifika grupu ida halo hela atividade jogu ilísitu (bola guling) iha área Comoro, Díli, nune’e arguidu ne’ebé sai mós hanesan membru PCIC tenta impede serbisu PNTL iha terrenu hodi la koopera ho PNTL, hodi rezulta membru PNTL ida ulun kanek.

Iha primeiru interrogatóriu ne’e Ministériu Públiku (MP) promove arguidu ba krime Obstrusaun ba autoridade públiku, tanba impede ona serbisu PNTL nian iha terrenu.

Audiénsia julgamentu prezide husi Juis singular, José Gonçalves, MP reprezenta Prokuradór Luis Hernani no arguidu hetan asisténsia legal husi Advogada privada Adelina Lobo.

Molok ne’e, Inspektór PCIC, Octávio da Costa Araújo, hateten PCIC kontinua fó  asisténsia ba nia membru ne’e tanba hetan detesaun hosi Komandu PNTL Munisípiu Díli no sei la intervein serbisu PNTL nian.

PCIC la halo intervensaun no respeita ba prosesu ne’ebé PNTL halo ba PCIC nia membru ne’e. Maibé PCIC fó asisténsia legál liuhusi advogadu. (car)